أو هكذا نقول معاشر القصمان، حينما [ تتطنّز ] بأحدهم، تأتيك هذه الطنزة، إما عاجلاً أو آجلاً!
والطنزة، هي ما تعيّرُ به المقابل، << تذكرت الرياضيات والمقابل والمجاور، وسقى الله تلك الأيّام!
كنت – ولازلت، حتى كتابة هذه التدوينة – أتسائل وبكل براءة: عن كيفيّة قدرة الأخوات على إضافة محتويات كثيرة في حقيبة صغيرة، أعني تلك التي تحملها المرأة أينما ذهبت وارتحلت! وتجد أنها تحوي هاتفاً محمولاً، علبة مكياج، شدو، برشر، وأحمر شفاه (وفي أحايين، أصفر، أخضر، برتقالي، وقائمة الألوان العريضة)، مقص أظافر << ! ، بالاضافة إلى محفظة، مناديل، فازلين << من أهمّ تلك المحتويات في نظري!، معقّم يدين، مفاتيح، آيبود في بعض الأحيان، وأشياء أخرى..
تصل هذه المرحلة لدرجة أن تُقيم تحدّي بأن تطلب شيئاً ليس موجوداً في تلك الحقيبة، والعجيب – وهنا السرّ – أن تلك الحقيبة لا تتجاوز كفّ يدك، أو أكبر بقليل! والبراعة تكمن في [ دعس ] تلك الأشياء، وحشرها في مكان كهذا.. الأعجب من ذلك كله: القدرة [ الهائلة ] على استخراج تلك الأشياء: دون النظر إلى الحقيبة، وبسرعة مُلفتة!
لا عجب! فهنّ فتيات، ولا ضير في ذلك كلّه.. فـ جزء من تكوين الشخصية للكائن الحيّ [ أنثى ] هو مكنون في تلك التفاصيل.
قبل أيّام، كنت أتأمّل ما أحمله في جيوبي الثلاث، وجدت أن الطنزة [ مدتنّ باليدّ ]، والمحصلة كانت:
أظنّ أني سأستعين بقدرات أم بانة على اختيار شنطة مناسبة أحملها، وتحملُ أغراضي!
تصدق تصلح موضوع تفاعلي “طلّع اللي بجيبك!” D:
فعلاً أغراض كثيرة نشيلها معنا لكل مكان .. لو كان مكانها شنطة كان ممكن أريح ..
خصوصاً الجوالات .. قلق
ههههههههه
فعلاً فكرة الموضوع التفاعلي “طلّع اللي بجيبك” رهيبة !
بالمناسبة ابو بانة ،، من وين شاري محفظتك ؟ لي مدة أبغى أشتري محفظة ولا لقيت شي زين
(للأمانة : محفظتك مهيب زينة مرة بس اللي أقصده أني أدور مكان فيه محفظات مهيب سادة :p)
مهند اعقلها وتوكل وانا اول مصورين اللي بالجيوب
إبراهيم المشكله تكمن في ايش ؟ <<< طبعا ما ادري تكمن في ايش بس جازت لي الكلمه وحبيت اكتبها ذذ
المشكله إذا طلعت اللي في جيبك وحصلت فواتير من اكثر من سنه ولا لها فايده بتاتا البته .. واوراق مالها سنع ابد لكن تشيلها كل يوم وتنقلها من ثوب لثوب ومن بدله لبدله .. لكن ما فيه وقت إن الواحد يرتب اموره ويضبط اللي يبيه ..
يعني اللي يشوف مخباتي دايم يقول وش هالشايب المقاول اللي ماسك بيوت الرياض ..
لكن في الواقع إذا طلعت الاوراق احصل حجوزات من 6 شهور واكثر ولا لهن سنع ابد يعني منتهي مدتهن .. او فاتورة صراف من البنك .. او مقاضي بيت .. الخ
هههههههههههههههههههههه
..
..
والله أنا أشيل هم جوالي وشلون عاد أكثر من جوال
ما شاء الله عليك .. وش هالمفاتيح
ألوانها ذكرتني بألوان نادي ضمك .. < شكلها طنزة لكن مهيب طنزة :p ..
فكرة الدوينة هذه المرة رااائعة جدا .. لا هنت أبو بانة
..
ههههههههههههه هذا الطنزة تلحق , بس جد أحس إني ضايعة بدونها ما أعرف امشي
حتى توصل أحيانا ألفز ” تي شيرت ” احتياط :$ و على قولة أميمتي لو أفلق بها يهودي تشهّد
و هالشيء يخلي منها سلاح فعّال لكن مغفول عنه P:
يالله كلها فترة و نشوف بالشوارع بالثوب و شخصية الشماغ مكملينها بشناط قوتشي و رالف لورين و طقتهم
بس ! أجل ماشفت شنطتي
أغراضك ..تقدر تتقلص بدل تليفون و البوك في جيب و الآيبود أو الاي فون مع المفاتيح بجيب ثاني
و لا عاد تطنز على أحد
اغراضك طبيعية جداً، عموما أنا أستغرب شلون جيب الثوب يشيل كل هالأغراض
وكيف بكل سلاسة أبوي يدخل يده ويطلع أوراق وبطاقات مجمعة بشكل مرتب! وأستغرب كيف ماتنحاس داخل الجيب وهي مافيه شي يمسكها!
مشكلة أغراضنا الكثيرة كلها ضرورية
مرة قررت أخفف شنطتي لأنها -حرفياً- مصعت يدّي
قعد أشوف الأغراض وماقدرت أشيل شي كانوا كلهم ضروريات
- كتاب (لو اضطريت انتظر في مكان عشان ما اتحسف)
-نوت رسم (لو جاني المزاج فجأه كالعادة!)
-قلم رصاص (للغرض أعلاه)
- مقص ومبرد أظافر (مثلا شي حد اظفري وصار يعلق بكل شي، يمديني اعدّل الوضع)
-ديتول
-مناديل معطرة (افضل لتنظيف العباية والأطفال!)
- مناديل عادية
- ورق حمام (الله يكرمكم) للأماكن العامة
- كريم مرطب
- لابيلو
- حبات نعناع للفم
-آيبود
-سمّاعات
-ايفون
-شاحن الايفون (لحالات الطوارئ)
-جوال بدون كاميرة (للتموية للجامعة)
-فلاش ميموري للحاجة
وأخيراً مفاتيح
//
الشيء اللي قدرت اشيله من اللست هو الآيبود فقط، وطبعاً لصغر حجمه ما سوّا اي فرق
** فتأكد ان الطنزة مابعد تلحقك
ياحليلك والله مخباك فااااااضي !
أنت بس شفني وأنا واقف ترا عرض خصري موب من السمنة ، من كثر البلاوي المدسوسة ذات اليمين وذات الشمال
وقررت قبل أسبوع أني أداوم بشنطة عشان أحس أن الريجيم يجيب نتيجة
الحمد لله أن الثوب هو الزي الرسمي !
حنى نسميها الهزوة عدوة يعني اللي تهزا بتصير له عدوي من اللي تهزا بهم
كنت أكره الشناط الكبيرة و ما أحب أشيل أغراض كثير بشنطتي كتبي بس ومحفظة وأتهزا بالبنات
اللي يسيلون شناط كبيرة و إكتشفت إني صرت زيهم
يعني كل اللي قلته صحيح يكون موجود بشناط البنات اضف لذلك معقم و صابون و مناديل مرطبة
و محفظة و كتب و دفتر و قلم
أغراضك جدًا قليلة مقارنة بنا
تدوينة لطيفة .. والطنزة فعلاً مدتن باليد, كنت أتطنز ببعض الشيبان بكثرة المفاتيح اللي يشيلونها معهم -ولعلك واحد منهم- وبت اليوم من أكثر الناس حملاً لأكبر عدد من المفاتيح ,, للأسف !
وأحلى ما بجيبك هو علك بو سهم الخطير , لله هو …… وأنت
يعطيك العافية
أنا شنطتي أسميها شنطة سبورت بلي:P <<للي يتذكر هالفلم الكارتوني القديم
يعني لو يسوون مسابقة من عندها شي عجيب في شنطتها بالراحة أفوز:P
انا مشكلتي بالمحفظة والاوراق اللي احطها فيها احياناً احصل فيها اوراق من سنتين اوثلاث
بديت افتش في البوك وحصلت كرت ميترو من باريس قبل سنة
وحصلت فاتورة تكسي في باريس بعد من سنتين
لكن بالعادة مااشيل اغراض كثير الايفون والمفاتيح والمحفظة واحياناً مناديل
مشاركة في فعالية مهند >> اجحدها عاد
http://twitpic.com/1aklom
انا مثلك اعاني تماما من هذه المشكلة علماً ان مثلا بطاقة الفاخرة في جيبي مع اني مستلمها من شهر !! ليش مبقيها مدري ..
عندي حافظة بطاقات بزنس كارد لان عندي ثلاث بطاقات !
وعندي جوالين وبوك ومحفظة مفاتيح وفلاشين >> غير حقيبة الفلاشات الي فيها 4 فلاشات ثانية
زي ما قال الشاعر الجاهلي:
مبقعة العالم !
حلوه يا ابو بانه
يا ابن الحلال انت ماشفت اللي عندنا
نوعيه من شرق اسيا ما ادري من اليابان او الصين
البنات يشيلون الشنطه اللي على الظهر المعروفه كل الناس يستخدمونه
لاكن عيالهم وشي .؟
شناط الحريم اللي على الكتف
ولا بعد ازيدك من الشعر بيت مره طاحت شنطه واحد وطلع الللي فيها كله
مكياج وكريمات ومناديل
ويتفننون من يجيب احسن شنطه
هههههههههههههههه
تحياتي ابو بانه
صدق الطنازه مدة باليد خخخ
سؤالي دائماً لأخواني ليه ماعندكم شناط؟!!
وخصوصاً أنكم احوج لها من النساء..
خروجكم كثير و أجهزتكم كثيرة وحوستكم واجد…
كل جيبوكم مفاتيح و مناديل وقراطيس علوك :d
….
لاغريب في ذلك
فنحن أصبحنا نمضي معظم ساعاتنا خارج البيت
ونحتاج لكل ما لا يجرنا إلى البيت
أحببت المفاتيح : )
تدوينه جميله..
فكره رائعه بس ممكن تناسب “الاناث” اكثر:
ان تضعي بداخل شنطتك عدد من المحافظ الصغيره ..وتخصصي كل واحده لاغراض مشابهه
مثلا..المحفظه الصغيره الاولى ..لادوات النظافه”مناديل,معقم,كريم…
الاخرى للمكياج مثلا …وهكذا ..
بهذه الطريقه يمكنك بسهوله تبدبل شنطتك او ترتيبها مع اختلاف المناسبات
*اسفه على المداخله “النسائيه” بس للفائده
أنا بعض الثياب صارت تضيق علي بسبب اللي بجيبي :s < اييييه صح صح يعني موب من الكرش :s
عاد طحت بحركة ذي الأيام .. اذا طلعت من البيت وأعرف إني بأطول لين أرجع له اجدع مفتاحه بدرج السيارة ومعاه اللي ما احتاجه في المكان اللي متوجه له فيصفى عادة جوال ومحفظة !